Chalk ka piece

Doston...zindagi ek classroom ki tarah hoti hai. Har mod pe, har waqt ye humme kucch sikahne ki koshish karti hai. Agar hum usse samajh ke zindagi ke test mein pass ho jaate hain, to next level pe jaate hai aur agar nhi to hume usse repeat karna padta hai. Aisa hi ek paath zindagi ne Aditya ko sikhaya, paath Change accept karne ka. Doston, hum bahut hi thehre hue log hai, kisi cheeez se itne jud jaaate hain ki jab wo cheez humse bichadti hai to hum sehen nhi kar paate, ro ro ke haalat kharab kar lete hai. Darasal, bachpan se hi hum aise conditioned hote hain ki change ko accept karne ka man hi nhi karta . Jab bhi bachpan mein main lambi chutti se aata to kai dino tak main ussi chutti mein jeeta tha. jab bagal ke school chhod ke , bada school join kiya tab bhi wahi lagav umad aata tha purane school ke liye, Aisi hi ek kahaani hai Aditya ki. Aditya...jiske maa baap uske report card mein likhe comments se itna proud feel karte the ki kya bataen..."A very Intelligent Boy.." Remarkable performanc son...keep it up". Aditya.. Jo apni class ke top 5 students mein se ek tha. Aditya...jisko apne baba se ajeeb ajeeb sawal poochne ka bahut shauk tha....ye sun gol kyon hota hai....is plate mein kitne chawal honge. Bas saara din yaa to padai...ya to bas TV pe "bol radha Bol" movie dekhte rehta tha. Uska ek aur sabse pyara dost hota tha...uska cousin bhai cheeku. waise to uska naam Varun tha par aapko to maloom hai hamara bhartiya tradition..yahaan sabko kucch na kucch pet name de diye jaate hai...jaise gudiya...monu,betu,nonu...aise aise naam hote hain...ki kabhi kabhi bacchon ko apna asli naam yaad hi nhi rehta. khair..Aditya ghar aane ke baad padai ke alawa,saara din cheeku se khelta rehta tha...kabhi cricket kabhi football, to kabhi kabhi dono apna favorite gaaan gaate the "imli ka boota bedi ka per,is jungle mein hum do sher, chal ghar jaldi ho gayi der" bas dono bacche ghar mein udham machate rehte the.Kabhi Kabhi cheeku bemani kar ke cricket mein out hone ke bawajood bhi batting aditya ko nhi deta, aur phir aditya ro ke apni chachi ke paas jaa ke cheeku ki shikayat karta. Akkhir 6 hi saal ke to the wo dono, cheeku bas 3 mahine chota hoga. Chachi bhi kya karti...cheeku ko daant ke aditya ko baating dilwa deti aur baad mein cheeku ke rondu se mooh ko cheer up karne ke liye dono bacchon ko ek ek chocolate de deti.
Bade pyar se rehte the sab. Is joint family mein. Aditya ke maa baap aur uski badi behan ek floor pe aur doosre floor pe aditya ke baba dadi aur uske chacha chachi cheeku ke saath. In sab mein pyar itna tha...ki jab bhi aditya class mein first aata to sab se pehle wo seedha chachi ke paas jaa ke unke gale lag kar unhe apna report card dikhata...aur chachi pura report card check kar ke aditya ko uski favorite chocolate deti. Aur mahashay phir lag jaate cheeku ke saath bat ball khelne mein. Haal ye tha ki hafte mein 3 din to aditya cheeku ke saath hi khana khata tha, sage bhaio jaisa pyar tha unme.
Kabhi kabhi doston lagta hai...ki zindagai tumhe khush nhi dekh sakti. jab bhi tum soch ke ki sab kucch kitna accha chal rha hai, ussi samay wo mano top ka gola fek degi tumare sir pe. Chacha ji ship mein kaam karte the merchant navy mein. Acchi naukri thi, paise bhi aache khaase kamate the par 8-10 mahine ship mein hi rehna padta tha...haal ye tha ke jab bhi aditya ki teacher usse pocchti thi ki "beta where does your uncle lives ",wo bolta tha "chacha...ship mein" . ek din chachaji ne aditya ke maa baap ko khane pe bulaya. kahane ke baad cheeku aur aditya roz ke tarah bagal waale kamre mein khelne lag gaye. Cheeku ke zor ka sixer lagaya aur ball dossre kamre mein gayi.
Jab Aditya ball lene gaya to chachaji maano sabko ek news de rhe the. "Maine decide kiya hai ki ...hum Australia jaaenge. Main kab tak cheeku aur uski mummy se itne mahine door guzaroon. Mujhe ab ek stable naukri chahiye Aur Australia mein kaaafi naukriya dekhi hai.Aur kal hi ek manager ka call aaya hai ki main agle mahine se join kar sakta hoon. Main jaa rha hoon, agar sab accha rha to aap sab ko bhi wahaan bula lunga. sab kamre mein chup se ho gaye. Aditya ye baat sun kar bahut pareshaan ho gaya. Cheeku, jiske bina wo ek pal nhi kaat sakta tha, school khatam hote hi bas cheeku ke saath khelne ke liye dauda dauda ghar bhaag aata tha. wo cheeku se ab shayad wo saalon tak nhi mil paaye.
1 march ko unko australia ke liye rawana hona tha. Aditya us din school nhi gaya. Cheeku se bhi nhi mila. Usko jaate dekh, wo apne rone pe control hi nhi kar paa rha tha. Par aakhri baar usko see off karte waqt wo uske paas gaya, gale mila.dono ke aakhon mein aason aa gaye. cheeku bola, "aditya ab tu bhi aa jana australia." Aditya bola "haan zaroor, tujhe kya chhaiye main tujhe koi gift dena chahta hoon". Cheeku soch mein pad gaya aur bade sochne ke baad bola, Aditya mujhe na ek green color ka chalk chahiye.
Bas cheeku ne bola aur aditya turant hi apne kamre ke talaash mein lag gaya, sara kamra chaan mara par wo chalk mil ke hi nhi diya. Cheeku ki flight subah ke 4 baje thi. raat ke 10 baje usse nikal na tha, nau baj chuke the.Aditya apne aap ko kons rha tha, kal hi mil leta cheeku se bajaye rone ke to school jaa kar le aata. 2 din se bimari ka bahana bana ke wo school nhi gaya tha. Uska man hi nhi lag rha tha ye sochte hue ki wo ab cheeku se nhi mil payega, kabhi nhi. Par aditya ne haar nhi maani, cheeku ke liye ye aakhri gift laana jaise uske liye sabse important cheez ban gaya ho. Badi mushkil se apne papa ki almari mein usse ek chhota sa white color ka piece mila. Aditya ne socha, par cheeku ne to green maanga hai. usne turant hi crayaon ka dibba khola aur lag gaya usse color karne, badi der baad paint aur crayon ke madad se wo usse green kar paya aur turant hi upar bhaaga. Tab tak cheeku neeche gaadi mein baith chuka tha. kamre mein koi nhi tha. Aditya turant hi neeche bhaaga, aur cheeku ko window ke baahar jhaakte hue dekha. Cheeku bhi jaise ussi ke intezaar mein baitha ho. Ek aakhri baar milna kitna zaroori hota hai Aditya ko pata chala. Aditya ke aakhon mein aason aa gaye, wo turant uski window waali seat pe gaya aur uske haath mein wo chalk ka tukda thama diya. ye dekh ke chachi ji ke aakho mein bhi aason aa gaye, unhone turant hi aditya ko gale se laga liya aur bola..."aditya ab aap turant australia aa jaana". cheeku ne apne aason ponche aur turant bhaar nikal ke aditya ke gale lag gaya. Aditya ne usse chup karate hue kaha..."Koi nhi cheeku tu australia jaa ke batting ki acche se tayari kar. agli baar meri balling pe six lagana hi hoga tujhe"....bas itni si thi ye kahani
Abhinav Bhatia abhinavbhatia.p12@imi.edu
9958480104